تاند『چهارشنبه د زمري ـ اسد ۸مه』په کابل کې د ممیزو د پروسس کارخونه پرانیستل شوه.
د طالبانو د حکومت د ریاست الوزراء اقتصادي معاونیت ویلي چې، دغه کارخونه چې نن (چهارشنبه) د کابل په استالف ولسوالۍ کې پرانیستل شوه، ۸ میلیونه ډالر پکې پانګونه شوې.
په پام کې ده چې دغه کارخونه په کلني ډول زر ټنه ممیز پروسس کړي.
د طالبانو د رییس الوزرا اقتصادي مرستیال ملا عبدالغني برادر چې د دې کارخونې په پرانیسته کې ګډون کړی و د کورنیو محصولاتو پر کیفیت او بسته بندۍ ټینګار کړی.
ملابرادر دا چاره د هېواد اعتبار او سوداګریزو اړیکو پراختیا لپاره مهمه بللې ده.
برادر زیاته کړې چې هڅه کوي د لاجوردو دهلیز په بشپړ ډول فعال او له دغې لارې اروپایي بازارونو ته د افغان سوداګرو لاسرسی ممکن کړي.
کارپوهان بیا د دا ډول کارخونو جوړېدل د بې روزګارۍ د مخینوي برخه کې مهم یادوي.
دوی وایي له یوه لوري به داخلي تولید او د انګورو له ضایع کېدو مخنیوی وشي او بل لورته به یو شمېر ځوانان په کار شي.