تاند『چهارشنبه د اسد ـ زمري لومړۍ』د طالبانو د بهرنیو چارو وزارت، د کونسلي چارو رییس، د دغه وزارت په رسنیزه غونډه کې وویل، چې ژر به جرمني کې د افغان پاسپورټ چاپ حوزه فعاله شي.
د طالبانو د کونسلي چارو رییس شعیب بریالي په خبره، دا حوزه به له څلور کلن ځنډ وروسته د آلمان په بن ښار کې فعالیت پیل کړي.
دا وروسته له هغې ده چې آلمان هم تایید کړه، چې د طالبانو دوه ډيپلوماټان یې منلي، څو دغلته مېشتو افغانانو ته کونسلي چارې آسانې کړي.
د طالبانو د بهرنیو چارو وزیر، امیر خان متقي وايي، آلمان کې شاوخوا ۵ سوه زره افغانان مېشت دي، چې د دوی ډيپلوماټان به د هغوی «اړتیاوو» ته رسیدنه وکړي.
امیرخان متقي په دې برخه کې د قطر له رول مننه کړې او جرمني سره د راتلونکو مذاکراتو سربېره یې ادعا کړې، چې دا لړۍ به نورو اروپايي هېوادونو ته هم وغځېږي.
د یادونې وړ ده چې، آلمان تېره اوونۍ د قطر په منځګړیتوب طالبانو سره تر خبرو او مذاکراتو وروسته، ۸۱ افغانان چې مجرمین بلل شوي وو، افغانستان ته وشړل.