تاند『پنجشنبه د چنګاښ ـ سرطان ۱۹مه』ننګرهار کې د طالبانو د امنیه قومندانۍ مسؤولان وایي، د دې ولایت مرکز جلال اباد ښار په څلورمه ناحیه کې د دېوال نړېدو پېښه کې دوه کارګر مړه شوي دي.
سرچینه وایي په مړو شوو کې یو د ننګرهار او بل د کونړ ولایت اوسېدونکی دی.
دغه راز د یوه بل خبر له مخې پکتیکا ولایت کې د طالبانو امنیه قومنداني په یوه خبرپاڼه کې وایي، چې د یحیی خېلو ولسوالۍ په منځ ګوډلو کلي کې یوه کس دوه تنه وژلي او څلور نور یې ټپیان کړي دي.
په خبرپاڼه کې راغلي چې، دغه کسان وړمه شپه په یوه کور کې د خپلمنځي شخړې پر مهال په چاقو وژل شوي دي.
سرچینه کاږي چې ، ټپیان د درملنې لپاره روغتون ته لېږدول شوي، چې په کې د یوه کس روغتیايي حالت نازک ښودل شوی دی.
خبرپاڼه زیاتوي چې، قاتل طالبانو نیولی او د پېښې په تړاو څېړنې روانې دي.