تاند『یکشنبه د چنګاښ ـ سرطان ۱۵مه』د تاجکستان د اصلاحاتو او ودې غورځنګ په یوه خبرپاڼه کې د ایران لوري له افغان کډوالو سره ناسم چلند په کلکه غندلی او هغه یې “ظالمانه او غیر انساني” بللی دی.
د دغه غورځنګ مشر شرف الدین ګدایف د ایران پر کړنو په نیوکې سره له اسلامي هېوادونو، ملګرو ملتونو، د اسلامي همکاریو له سازمان او نړیوالو بشري او حقوقي بنسټونو غوښتي، چې د ایران د بشري جنایتونو او د بشري حقونو د سرغړونې په تړاو خپلواکې پلټنې وکړي.
نوموړي د ژبنۍ همغږۍ، فارسي ژبو ملتونو د یووالي او د افغانستان، تاجکستان او ایران د ګډ فرهنګ په تړاو د ایراني چارواکو خبرې “دروغ، ریا کاري او سیاسي دوکه” بللې دي.
پرون (شنبه، د چنګاښ/ سرطان ۱۴ مه) د امریکا پخواني دیپلومات او د افغانستان لپاره ځانګړي استازي زلمي خلیلزاد هم، د افغان پناه غوښتونکو د ایستلو په تړاو د ایران کړنلاره په کلکه وغندله.
نوموړي په خپله «ایکسپاڼه» (پخواني ټویټر) کې په یوه لیکنه کې ویلي:
«په وروستیو ورځو کې د ایران حکومت زرګونه افغان پناه غوښتونکي په زور له هېواده ایستلي دي. که څه هم د پناه غوښتونکو ستنول، کله نا کله موجه کېدای شي، خو زه باور نه لرم چې اوسنی وخت د دې کار لپاره مناسب وي. حتی که وخت یې هم راغلی وي، هغه طریقه چې د ایران اسلامي جمهوریت په دې برخه کې عملي کوي، ناڅاپي او له افغان چارواکو سره بې له هر ډول همغږۍ ده. دا کار ناسم دی او زه یې غندم.»
خلیلزاد د افغانستان او ایران ترمنځ د ژور فرهنګي تړاو یادونه کړې او د ښه ګاونډیتوب پر اصل یې ټینګار کړی. هغه ویلي، په تېرو پنځوسو کلونو کې میلیونونو افغانانو په ایران کې ژوند او کار کړی. همداراز، ډېری افغانان د ایران لهخوا سوریې ته استول شوي چې هلته د ایران د حکومت په ګټه وجنګیږي.