تاند『چهارشنبه د چنګاښ ـ سرطان ۴مه』د ایران پارلمان د اټومي انرژۍ نړیوالې ادارې یا IAEA سره د دغه هېواد د همکارۍ بندولو لایحه تصویب کړه.
دا قانون چې د ایران د ملي امنیت شورا وروستۍ منظورۍ ته به اړتیا ولري، که منظور شي، نو د ایران حکومت به د اټومي انرژۍ نړیوالې ادارې هر ډول څارنه بنده کړي.
دا اقدام د ملګرو ملتونو د اټومي څار بنسټ د هغه دریځ په غبرګون کې شوی، چې د امریکا او اسراییل له لوري د ایران پر خاوره د بریدونو پر مهال و.
د ایران پارلمان مشر، محمد باقر قالیباف وویلي، چې IAEA یوه سیاسي وسیله ګرځېدلې او پر ایران یې د امریکا او اسراییل برید پر مهال عادلانه دریځ نه و خپل کړی.
نوموړي زیاته کړې، چې د ایران حکومت به له دې وروسته د اټومي پروګرام پراختیا چټکه کړي.
دا په داسې حال کې ده چې یوې امریکايي استخباراتي ادارې راپور ورکړی، چې د ایران پر اټومي تاسیساتو د امریکا بریدونو کې دغو تاسیساتو ته د حساب وړ زیان نه دی اوښتی او کولای شي چې بیا فعال شي.
په داسې حال کې چې پر ایران د اسراییل او امریکا ګډ برید د دغه هېواد د اټومي پروګرام د له منځه وړلو په موخه و، نږدې ټولو هېوادونو یو دریځ خپل کړی، چې ایران باید اټومي وسلې ونه لري.
باور دادی، چې ایران د دغه هېواد پر اټومي پروګرام د اټومۍ انرژۍ نړیوالې ادارې د څار برخه کې بندیز ولګوي، ایران به وتوانېږي، چې له دې وروسته اټومي وسلې جوړې کړي.