تاند『 چهارشنبه د چنګاښ ـ سرطان ۴مه』د ایران روغتیا وزارت وایي، چې له اسراییل سره په ۱۲ ورځنۍ جګړه کې ۶۱۰ کسان وژل شوي او څه کم ۵ زره ټپیان دي.
د رویټرز خبري اژانس د راپور پر بنسټ بیا په اسراييل کې د دغې جګړې له امله ۲۸ کسان وژل شوي دي.
د اسراييل د پوځ راډیو ویلي، ایران د دوی پر سیمو له ۵۰۰ تر ۵۵۰ بالیستیکي توغندي توغولي او له زرو د زیاتو بې پیلوټه الوتکو بریدونه یې کړي.
سرچینې زیاتوي، چې دغو بریدونو پراخ ویجاړی رامنځته کړې دي.
اخوا بیا د ایران ولسمشر، مسعود پزشکیان د سېشنبې په ورځ په یوه وینا کې اعلان وکړ چې دا شخړه، چې د اسراييل له لوري د روانې جون میاشتې په ۱۳مه پیل شوې وه، اوس پایته رسېدلې او له دولتي ادارو یې وغوښتل چې ژر تر ژره د بیا رغونې چارو ته مخه کړي.
د ایران او اسراییل ترمنځ ۱۲ ورځنۍ جګړه پرون سه شنبه د امریکا د ولسمشر ټرمپ د اوربند په وړاندیز پای ته ورسېده.
اسراییل او ایران دواړه لورو اوربند ته غاړه کېښوده او جګړه یې پایته ورسوله.