یکشنبه، د چنګاښ/ سرېان لومړۍ) د بلوچستان د آزادۍ پوځ (بلوچ لبریشن آرمي – BLA) په نوم د بلوچستان بېلتون غوښتونکې ډلې تېره شپه ادعا وکړه چې د قلات په سیمه کې یې په شپږو پرلهپسې بریدونو کې «د پاکستان قابض پوځ» ته درنه مرګژوبله اړولې او ۱۵ سرتېري یې وژلي دي.
د دې ډلې په وینا، په یادو بریدونو کې له IED (د ماین چاودنې) او مستقیمو وسلهوالو بریدونو څخه کار اخیستل شوی دی.
د بلوچستان د ازادۍ پوځ په یوه خبرپاڼه کې ویلي چې جنګیالیو یې پرون (شنبه) د قلات د منګچر په سیمه کې یوه بند (ډیم) ته نژدې، د پاکستان د پوځ هغه سرتېري په ریموټ کنټرول IED (چادېدونکي وسیله) برید کې په نښه کړل، چې د پوځي کاروان د امنیت لپاره یې موقتي مورچل ته ځان رسولی و.
په خبرپاڼه کې وړاندې راغلي:«جنګیالیو له وړاندې هلته چاودېدونکي مواد ځای پر ځای کړي وو. په دې چاودنه کې د دښمن دوه سرتېري پر ځای وژل شوي دي.»
په همدې ځای کې، جنګیالیو د پوځ هغه سرتېري په دوهم IED برید کې هم وویشتل، چې په یوه ځای راټول شوي وو. د چاودنې په پایله کې له شپږو سرتېرو څخه دوه وژل شوي او څلور نور سخت ژوبل شوي دي.
همداراز، د بلوچستان د ازادۍ پوځ جنګیالیو د قلات په موړګند سیمه کې، د مکۍ په ځای کې، د پوځ پر هغو سرتېرو باندې هم IED برید کړی، چې د پوځ د کاروان د امنیت لپاره موقتي مورچل ته رسېدلي وو. په دې برید کې هم دوه سرتېري وژل شوي دي.
وروسته بیا، جنګیالیو د بم شنډولو (بمډسپوزل) دوه سرتېري چې په سیمه کې بوخت وو، د IED په برید کې ووژل.