تاند「شنبه د چنګاښ ـ سرطان لومړۍ」د طالبانو د کډوالو او بیرته راستنېدونکو چارو وزارت وايي، د پاکستان له زندانونو ۵۲۰ تنه افغانان ازاد او هیواد ته راستانه شول.
دغه وزارت نن (شنبه) پر خپله اکسپاڼه لیکلي چې یاد شمېر افغانان د رواني غبرګولي میاشتي پر ۳۰ او ۳۱مه د کندهار ولایت پر سپین بولدک فرضي کرښه او د ننګرهار ولایت پر تورخم دروازه هیواد ته راستانه شول.
سرچینه زیاتوي، چې دوی ته د مرستندویه سازمانونو له خوا تر مرستو ورکولو وروسته خپلو سیمو ته ولېږدول شول.
سرچینه وایي، چې یاد افغانان د پاکستان په بېلابېلو سیمو کي د پولیسو له خوا نیول شوي او زنداني شوي وو.
د یادونې وړ ده چې تر دې یوه ورځ وړاندې هم ۳۰ تنه افغانان چې د پاکستان په زندانونو کې بندیان وو آزاد هېواد ته راستانه شوي دي.
بل لورته له ایرانه د هغو افغانانو شمېر څو برابره ډېر شوی، چې د ایران ویزې لري او هېواد ته راستنېږي.
د شمېرو له مخې، پر ایران د اسراییلو له برید مخکې هره ورځ تر ۷سوو ویزه لرونکي افغانان له دې لارې هېواد ته راستنېدل خو اوس دا شمېر له تر ۴ زرو رسېږي.
د بي بي سي د راپور له مخې د هغو افغان کډوالو شمېر کم شوی چې ایران کې د اوسېدو قانوني اسناد نه لري او د ایران حکومت یې په زور افغانستان ته ستنوي.