یکشنبه، د غبرګولي/ جوزا ۲۵ مه)
بغداد: امریکا دې د عراق له فضا د اسراییلي الوتکو د تېرېدو مخه ونیسي
د عراق حکومت د شنبې په ورځ له متحدو ایالتونو وغوښتل چې د اسراییلي جنګي الوتکو له لوري د عراق د هوایي حریم د کارولو مخه ونیسي، څو پر ایران بریدونه ترسره نه کړي.
د عراق د پوځ ویاند، صباح النعمان، په یوه بیان کې وویل:
«د عراق حکومت له متحدو ایالتونو غواړي چې د دواړو هېوادونو ترمنځ د لاسلیک شوو موافقو پر بنسټ خپل مسوولیتونه ادا کړي، او د اسراییلي الوتکو له خوا د عراق د حریم بیا سرغړونې مخه ونیسي.»
اسرائیل وايي په خرمآباد کې یې د ایران پر یوه توغندويي ښارګي برید کړی
د اسراییل پوځ اعلان کړی چې د شنبې په ورځ یې د ایران د لورستان ولایت په مرکز خرمآباد کې یوه تر مځکې لاندې پوځي اډه په نښه کړې، چېرې چې له مځکې څخه مخکه ویشتونکي توغندي او کروز توغندي ساتل کېدل.
د پوځ ویاند، افي دفرین، خبریالانو ته ویلي:
«دا یوه مهمه پوځي اډه ده چې پخوا د ایران د رژیم له خوا د تبلیغاتي ویډیوګانو په ترڅ کې نندارې ته وړاندې شوې وه.»
د هغه اشاره د سپاه پاسداران هغو ویډیوګانو ته وه چې څو میاشتې وړاندې خپرې شوې، او ویل شوي و چې دا تر مځکې لاندې یوه خورا خوندي اډه ده.