تاند「جمعه د غبرګولي ـ جوزا ۲۳مه」د ایران بهرنیو چارو وزارت د اسرائیلو هوایي بریدونه د ایران پر ملي حاکمیت او ځمکنۍ بشپړتیا ښکاره تېری بللی او دا یې د ملګرو ملتونو د منشور د دویمې مادې د څلورم بند او نړیوالو اصولو ښکاره نقض بللی دی.
یاد وزارت په یوه اعلامیه کې ویلي،چې د ملګرو ملتونو د منشور د ۵۱مې مادې له مخې، د دغه «تېري» ځواب ورکول د ایران قانوني او مشروع حق دی.
د ایران د بهرنیو چارو وزارت ټینګار کړی چې د ایران وسله وال ځواکونه به د هېواد د دفاع لپاره، په هر ډول چې مناسب وبولي، له هیڅ اقدامه ډډه ونه کړي.
دغه راز، د ایران بهرنیو چارو وزارت زیاته کړې چې ، دا د ملګرو ملتونو د امنیت شورا مسوولیت دی چې د نړیوالې سولې او امنیت د نقض پر وړاندې ژر او جدي اقدام وکړي.
په اعلامیه کې دا هم راغلي چې د امریکا حکومت، چې د اسراییل اصلي ملاتړی دی، باید د «صهیونیستي رژیم» د دغو کړنو د خطرناکو پایلو مسوولیت پر غاړه واخلي.
بل لورته قطري رسنیو راپور ورکړی چې د دغه هېواد دولت پر ایران د اسرائيلو بریدونه غندلي او دا یې د ایران د ځکمنۍ بشپړتیا، حاکمیت او له نړیوالو قوانینو ښکاره سرغړونه بللې ده.
راپورونو زیاته کړې چې قطر دغه کړکېچ د سیمې د سولې او ټيکاو لپاره ګواښ بللی او له نړیوالې ټولنې یې غوښتي چې قانوني او اخلاقي مسوولیت ادا او د اسرائيلو د سرغړونې مخه ونیسي.
د قطر دولت له ښکېلو خواو د زغم او د کړکېچ د پراخېدو د مخنیوي غوښتنه کړې ده.