تاند「چهارشنبه د غبرګولي ـ جوزا ۲۱مه」په پکتیا کې د طالبانو د رسنیو دفتر د خبرپاڼې له مخې؛ د اختر په ورځو کې د دې ولایت د ځاځي اریوب ولسوالۍ سپینې شګې تفریحي پارک ته څه باندې ۳۵۰ زره سیلانیان تللي دي.
طالب چاوراکي وایي، په دې تفریحي پارک کې د سیلانیانو لپاره اړین خدمتونه هم برابر شوي دي.
په خبرپاڼه کې راغلي چې، یاد پارک یوه خصوصي شرکت ته په قرارداد ورکړ شوی دی.
د دې شرکت د څرګندونو له مخې؛ په ياده تفريحي سيمه کې دوه زره خېمې، د ناستې لپاره غرفې، ۲۴ساعته مخابراتي خدمات او برښنا، د اوبو سېسټم، دوه لوی هوټلونه، ايسکريم خونې، کافي شاپونه او نور بېلابېل خوړنځايونه جوړ شوي دي.
دغه راز د یوه بل خبر له مخې د اختر په ورځو کې ۴۰زره کورنيو او بهرنيو سېلانیانو له بامیان ولایت څخه لیدنه کړې ده.
د خبرپاڼې له مخې؛ دغه راز ۴زره کورنیو او بهرنیو سیلانیانو تاریخي او لرغونې سیمې لیدلي دي.
طالبان وایي، چې د ګرځندویانو د جذب لپاره یې د آسانتیاوو برابرولو هڅې پیل کړې دي.