تاند (چهارشنبه، د غبرګولي/ جوزا ۲۱ مه) د امریکا د بهرنیو چارو وزارت ویانده تیمي بروس، پرون (سې شنبې) وویل چې هغه افغان کډوال چې د ځانګړي کډوالۍ ویزې (SIV) دوسیې لري، امریکا ته د داخلېدو د بندیز له فرمان څخه مستثنا دي.
هغې په یوه تازه خبري ناسته کې ټینګار کړی چې دغه کسان د ډونالډ ټرمپ د اجرايي فرمان له بندیز څخه معاف دي او متحدو ایالتونو ته راتلی شي.
د امریکا د باندنیو چارو وزارت ویاندې د یوې پوښتنې په ځواب کې وویل: «زه پوهیږم چې د هغو ویزو په اړه محدودیتونه شته چې {د افغان اتباعو لپاره} دي؛ خو د کډوالۍ د ځانګړو ویزو (SIV) لپاره، یو اعلامیه خپره شوې چې وایي افغان SIV ویزې – اجازه راکړئ دا ووایم – امریکا ته د داخلېدو د بندیز له فرمانه معاف بلل کیږي.»
تیمي بروس وایي چې په ټوله نړۍ کې د امریکا په سفارتونو او قونسلګریو کې د مرکو په شمول د افغانانو لپاره د امریکا د کډوالۍ د ځانګړو ویزو قونسلي پروسې دوام لري.
خو هغې د هغو کسانو په اړه چې د کډوالۍ دوسیې یې د “P1” او “P2” پروګرامونو لاندې دي، څه ونه ویل.
دا په داسې حال کې ده چې د امریکا ولسمشر ډونالډ ټرمپ، یو نوی اجرايي فرمان لاسلیک کړی چې پر اساس یې امریکا ته د افغانستان په شمول د ۱۲ هېوادونو د اتباعو پر سفر بندیز لګول شوی دی.
د ټرمپ اداره وایي چې دا اقدام د ملي امنیت په هدف شوی او ادعا کوي چې یاد هېوادونه یا د ترهګرۍ مرکزونه دي یا د مسافرو د هویت د تثبیت په برخه کې لازم ستندردونه نه پلي کوي.