تاند【سه شنبه د غبرګولي ـ جوزا ۱۳مه】د راپورونو له مخې د روسیې او اوکراین ترمنځ دویم پړاو خبرې له کوم پرمختګ پرته پای ته ورسېدې.
په دغو خبرو کې یوازې د بندیانو پر تبادلې هوکړه شوې، خو په اوربند بیا هیڅ ډول هوکړه نه ده شوې.
بي بي سي د اوکرایین مرکچي پلاوي له قوله راپور ورکړی، چې دوی له کوم قید او شرط پرته د اوربند وړاندیز ورکړ، خو مقابل لوري ورسره پرې هوکړه نه ده کړې.
د روسیې او اوکراین ترمنځ د خبرو دویم پړاو په داسې کړکیچن حالت کې پیل شو، چې اوکراین د روسیې پر څلورو پوځي اډو پراخ بریدونه وکړل.
اوکراین په دغو بریدونو کې روسیې ته د ۷ ملیارد ډالرو زیان واړوه.
له بل لوري رسنیو راپور ورکړی، چې روسیې د اوکراین بریدونو په غبرګون د یاد هېواد په ځینو برخو تازه بریدونه کړي.
په دغو ترسره شویو تازه بریدونو کې د درنې مرګ ژوبلې ترڅنګ پراخ زیانونه هم اوښتي دي.