تاند【 دوشنبه د غبرګولي ـ جوزا ۵مه】په هېواد کې د ښکار د مخنیوي کمپاین پر دوام، غزني کې د طالبانو د حکومت مسوولین وایي، د جغتو ولسوالۍ په «تلخک» کلي کې له یو کور څخه د هوسۍ بچی ترلاسه او ژغورلی دی.
د هوسۍ دغه بچی د یاد ولایت د چاپېریالساتنې ریاست مسوولینو او د طالب استخباراتو په ګډه همکارۍ پرون (یکشنبه، د جوزا ۴مه) ژغورلی دی.
د مسوولانو په وینا دغه هوسۍ د «علي محمد داوان» په نوم یو سړي په خپل کور کې په ناقانونه توګه ساته، او له ترلاسهکېدو او ژغورلکېدو وروسته د ساتنې او پالنې په موخه کابل ته لېږدول شوی دی.
په دې اړه خپره شوې خبرپاڼه کې دغه راز ویل شوي،چې ژغورل شوې د هوسۍ بچی به پخپل ځان تر بسیا کېدا وروسته په یوه خوندي ځای کې خوشې شي.
دا اقدام وروسته له هغې کېږي، چې د طالبانو د ریاست الوزرا د حکم له مخې په ټول هېواد کې د وحشي ژوو، مارغانو او کبانو پر ښکار او قاچاق بندیز لګېدلی او په دې تړاو نیولشویو کسانو ته د سزا خبرداری ورکړی شوی دی.