تاند【سه شنبه د ثورـ غویي ۳۰مه】د طالبانو د کډوالو او بېرته راستنېدونکو چارو وزارت وایي، په تېرو دوو ورځو کې د پاکستان له بېلابېلو بندخونو ۵۳۲ تنه افغانان کډوال ازاد او بېرته هېواد ته راستانه شول.
دغه کډوال پاکستان کې د قانوني اسنادو نه درلودو له امله زنداني شوي وو.
سرچینه سپین بولدک کې د طالبانو د سرحدي آمریت له قوله ویلي، چې پرون دوشنبه یې ۲۸۶تنه افغانان چې له یوې تر دوو ورځو د پاکستان په بېلابېلو بندخونو کې ساتل کېدل بېرته راخوشې او هېواد ته راستانه کړل.
دغه راز د تېرې یکشنبې په ورځ هم د پاکستان له بندخونو ۲۴۶ تنه افغانان راخوشې او بېرته هېواد ته راستانه شوي دي.
پاکستان کې د افغان کډوالو وضعیت خورا د اندېښنې وړ بلل کېږي او هره ورځ سلګونه کسان په جبري ډول له دغه هېواده شړل کېږي.
د پاکستان له لوري د وروستي پړاو افغان کډوالو جبري اېستلو د لړۍ له پیله تر دې دمه، طالب چارواکي وایي د دوی په هڅو زرګونه هغه افغانان چې د قانوني اسنادو د نشتون له کبله د پاکستان په زندانونو کې ساتل کېدل راخوشي او بیرته هېواد ته راستانه شوي دي.