تاند【پنجشنبه د ثور ـ غویي ۲۵مه】ایراني رسنۍ وایي، چې نږدې۵۰ سلنه ناقانونه افغان کډوال په تهران کې مېشت دي.
د تهران والي علي رضا فخاري ویلي، چې دا کسان باید د قانون له مخې په نښه او په درناوي خپل هېواد ته واستول شي.
نوموړي زیاته کړې، چې په پلازمېنه کې د ناقانونه افغان کډوالو حضور ته باید په منظمه او قانوني بڼه رسېدنه وشي.
فخاري زیاته کړې، چې په ملي او سیمه ییزه کچه د تهران په څېر لویو ښارونو کې د ناقانونه کډوالو په اړه د پاملرنې ډیریدو غوښتنه کړې ده.
ایراني رسنۍ وایي، دغه هېواد په نړۍ کې د کډوالو تر ټولو سترو کوربه هېوادونو څخه شمېرل کیږي او تر ټولو ډیر افغان کډوال په دغه هېواد کې مېشت دي.
دا په داسې حال کې ده چې بل لورته د کډوالۍ نړیوال سازمان ویلي، په تېرو ۴۲ ورځو کې له پاکستانه څه باندې ۱۲۸زره افغان کډوال بېرته هېواد ته ستانه شوي دي.
د دې سازمان د معلوماتو له مخې، دا شمېرې د اپرېل له لومړۍ نېټې د مې تر ۱۲مې پورې ثبت شوي، چې زیات شمېر کډوال په زور ایستل شوي دي.
سرچینه زیاتوي چې د دغه سازمان له شاوخوا ۶۸ زرو راستانه شویو افغانانو سره د سرپناه، خوړو، روغتیايي خدمتونو او نورو اساسي اړتیاوو په برخه کې مرستې کړي دي.