تاند【دوشنبه د ثور ـ غویي ۱۵مه】د ملګرو ملتونو د بشري حقونو په شورا کې د افغانستان دایمی استازی نصیر احمد اندېشه وايي، له سویس څخه یې د هغې طرحې په اړه وضاحت غوښتی، چې له مخې یې په دې هېواد پښتانه کډوال د قومیت پر اساس ایستل کېږي.
د سویس هېواد یو شمېر داخلي اسناد چې ځینو سویسي رسنیو هم خپاره کړي، ښيي چې ښايي پښتانه کډوال له دې هېواد بېرته افغانستان ته واستول شي.
د معلوماتو له مخې د سویس دا طرحه په ډاګه کوي، چې د طالبانو له حکومت سره د ژبې او قوم له مخې د نږدېوالي له امله، پښتنو پناه غوښتونکو ته په افغانستان کې ښايي خطر کم وي.
که څه هم د سویس هېواد چارواکو د یادې طرحې خلاف غبرګونونو او د ملګرو ملتونو د بشري حقونو په شورا کې د افغانستان استازولۍ د غوښتي وضاحت په اړه څه نه دي ویلي، خو د سویس د اخراج څانګې چارواکو د دغه هېواد کډوالۍ دفتر ته لیکلي، چې د پناه غوښتنې برخه کې د سیاسي ستراتیژۍ له بدلون سره د قوم پر بنسټ اخراج باندې غور کېدای شي.
د سویس کډوالۍ دولتي دفتر له لوري دا پرېکړه د افغانستان د بشري حقونو مدافعینو له خوا د کډوالۍ او بشر حقونو قوانینو خلاف عمل بلل شوې ده.
د کډوالۍ نړیوال قوانین او حقوق دا بیانوي چې د هېوادونو وګړي پرته له کوم تبعیض او نژادي توپیر کولای شي، نورو هېوادونو کې د پناه غوښتنې او نړیوال خوندیتوب ترلاسه کړي.