تاند (سې شنبه، د غويي/ ثور ۹ مه) د طالبانو د حکومت د صنعت او سوداګرۍ وزارت وايي چې تېر کال هند ته د افغانستان صادرات ۶۲۷ میلیون ډالرو ته رسېدلي دي.
دا په داسې حال کې ده چې د دواړو هېوادونو تر منځ د ټولې سوداګرۍ ارزښت ۸۹۰ میلیون ډالرو ته لوړ شوی دی.
د صنعت او سوداګرۍ وزارت ویاند «عبدالسلام جواد» وویل چې په ۱۴۰۳ لمریز کال کې د افغانستان صادرات هند ته د نورو کلونو پرتله ډېر شوي دي.
نوموړي زیاته کړې، چې په همدې موده کې د افغانستان واردات له هند څخه ۲۶۳ میلیون ډالر وو، او په ټوله کې د دواړو هېوادونو د سوداګرۍ ارزښت ۸۹۰ میلیون ډالرو ته رسېږي.
جواد وویل چې د افغانستان صادراتي توکي هند ته وچ اینځر، زعفران، ممیز، زیره او بادام دي.
د طالبانو د حکومت د صنعت او سوداګرۍ وزارت ویاند همدارنګه څرګنده کړې چې تېر کال افغانستان له هند څخه بوره، صنعتي خام مواد، ټوکر او د موټرو پرزې واردې کړې دي.
خو له دې سره، مخکې د افغانستان د سوداګرۍ او پانګونې خونې غړي «خانجان الکوزی» اعلان کړی و چې د تېر کال په اوږدو کې د افغانستان صادرات هند ته ۵۰۰ میلیون ډالرو ته رسېدلي دي. د هند د سوداګرۍ وزارت د معلوماتو له مخې، له هغه وخت راهیسې چې طالبان د ۲۰۲۱ په اګست (اسد) کې واک ته رسېدلي، د دې هېواد سوداګرۍ له افغانستان سره پوره بدلون کړی دی.
عبدالسلام جواد همداراز د سوداګرۍ پر وړاندې موجودو ستونزو ته اشاره وکړه او ټینګار یې وکړ، چې په وروستیو ورځو کې له هند سره د افغانستان صادرات وروسته له هغې ودرېدل چې د واګه–اټاري پوله د سیمې د سیاسي کړکېچونو له امله وتړل شوه. د دې بندښت له امله په هندي بازارونو کې د وچې مېوې بیې تر ۲۰ سلنې پورې لوړې شوې دي.