تاند 【دوشنبه د ثور ـ غویي ۸مه】ایراني چارواکو د طالبانو له حکومت سره په میلک دره کې ۲۰۱ بندیان تبادله کړي دي.
دغه دره د سیستان او بلوچستان شمال کې موقعیت لري.
د راپورونو له مخې، ۲ ایرانیان چې د طالبانو له حکومت سره سره بندیان وو، د ۱۹۹ افغان بندیانو په بدل کې تبادله شوي دي.
که څه هم په دې تبادله کې د طالبانو عدلیې وزارت او زندانونو چارو ریاست چارواکو ګډون کړی، خو طالبانو تر اوسه په دې اړه څه نه دي ویلي.
دغه بندیان د تهران، سیستان او بلوچستان، او اصفهان په بندخونو کې ساتل کیدل.
د ایران بشري حقونو سازمان د راپور له مخې د یاد هېواد حکومت په وروستیو کې د بېلابېلو تورونو له امله د افغانانو د اعدام کچه هم لوړه کړې ده.
که څه هم له دې وړاندې طالبانو له ایران غوښتي وو، چې په دغه هېواد کې له افغان بندیانو سره د بشري حقونو په پام چلند وکړي، خو د راپورونو له مخې د ایران په یو شمېر زندانونو کې افغانان تر سختو شکنجو لاندې دي.