تاند【دوشنبه د ثور ـ غویي ۸مه】د هند ایکانومیک ټایمز ورځپاڼې په یوه راپور کې ویلي، چې د پاکستان له لارې هند ته د افغانستان د صادراتو له ځنډېدو وروسته د هند په بازارونو کې د وچو میوو بیه ۲۰ سلنه لوړه شوې ده.
دې ورځپاڼې د دوشنبې په ورځ (د غویي اتمه) راپور ورکړی، چې د هند او پاکستان ترمنځ د واګه-عطاري سرحدي دروازې له تړلو وروسته هند ته د افغانستان صادرات بند شوي دي.
دا صادرات داسې مهال ځنډیږي، چې تازه د هند او پاکستان ترمنځ حالت سخت ترینګلی شوی دی.
د دواړو هېوادونو ترمنځ وروسته له هغې حالت جګړه ییز شو، چې کله د هند تر ولکې لاندې کشمیر کې پر سیلانیانو وسله وال برید کې ۲۶ سیلانیان ووژل شول او هند د دې برید مسوول پاکستان بولي.
تر برید وروسته دواړو هېوادونو پر یو بل بندیزونه ولګول او له یو بل سره یې اړیکې محدودې کړې.