تاند (جمعه، د غويي/ ثور ۵ که) د بریتانیا حکومت هم په لومړي ځل د طالبانو له واک ته رسیدو وروسته څو تنه جنایتکاره افغانان له خپلې خاورې افغانستان ته واستول.
د هایفن د راپور له مخې، یو کس د ۲۰۲۱ کال په اګست کې — څو ورځې د بریتانیایي وګړو او افغان همکارانو د بیړنۍ ایستنې (evacuation) له پیلېدو مخکې — د یوه تجارتي پرواز له لارې افغانستان ته واستول شو. نور هغه کسان چې ایستل شوي، د لا جدي جرمونو لکه جنسي تیري او تاوتریخوالي په جرمونو محکوم شوي وو. ویل شوي چې د بریتانیا د کورنیو چارو وزارت د ډېری جرمونو دقیق ماهیت له دې کبله چې د دغه هیواد قوانین د مجرمانو محرمیت په پام کې لري، نهدی ښودلی.
ټول اته کسان د “رضاکارانه ایستنې” په کټګورۍ کې شامل شوي، یعنې هغوی له حکومت سره له بریتانیا څخه د وتلو په بهیر کې همکاري کړې ده.
د بریتانیا د کورنیو چارو وزارت تایید کړې چې دوی د تجارتي هوايي شرکتونو له لارې ایستل شوي او د بیا میشتېدنې په خاطر یې تر یو نیم زر پونډه مرسته ترلاسه کړې ده.
که څه هم له بریتانیا څخه له ۲۰۲۱ راهیسې افغانستان ته د بېرته ستنولو چارې ځنډېدلې وې، خو د دغه هیواد د کورنیو چارو وزارت لا هم رضاکارانه ایستنې تنظیموي.
ځینې افغان کتونکي وايي، تمه ده چې د طالبانو حکومت هم له دغو اخراج شویو کسانو سره د مجرمانو په ډول چلند وکړي ځکه چې هغوی له افغانستانه دباندې د افغانانو د نوم بدۍ سبب شوي دي.