تاند (پنجشنبه، د وري/ حمل ۲۸ مه) د روسیې سترې محکمې د پنجشنبې په ورځ رسماً طالبان د ترهګرو ډلو له لیست څخه وایستل، چې دا یو سمبولیک ګام بلل کېږي او د افغانستان له واکمنانو سره د مسکو د اړیکو تودېدو ښکارندويي کوي.
د دولتي خبري آژانس تاس د راپور له مخې، د سترې محکمې قاضي اولېګ نېفېدوف وویل: «د طالبانو په فعالیتونو باندې له وړاندې لګول شوی بندیز… لغوه شوی دی. دا پرېکړه سمدستي حقوقي اعتبار لري.»
یاده پرېکړه چې د تړلو دروازو تر شا ناسته کې وشوه، د تیرې میاشتې د هغه غوښتنلیک په تعقیب شوې چې د روسیې د لویې څارنوالۍ دفتر د ترهګرو ډلو له لیست څخه د طالبانو د ایستلو لپاره وړاندې کړی و.
که څه هم دا ګام د طالبانو د حکومت د رسمیت پېژندلو معنا نه لري، خو دا هغه حقوقي خنډ له منځه وړي چې د روسي چارواکو لپاره یې له طالبانو سره په رسمي محافلو کې د ګډون مخه نیوله. د روسیې د ترهګرو ډلو له لیسته د طالبانو ایستل د دواړو هیوادونو د اړیکو عادي کېدو پر لور یو مهم ګام بلل کېږي.
په وروستیو کلونو کې د طالبانو استازو څو ځله روسیې ته سفرونه کړي دي، چې پکې د ۲۰۲۲ او ۲۰۲۴ کلونو د پترزبورګ اقتصادي فورم کې ګډون هم شامل دی. هغوی د ۲۰۲۳ په اکتوبر کې د روسیې له بهرنیو چارو وزیر سرګي لاوروف سره هم ولیدل.
روسیې په لومړي ځل طالبان په ۲۰۰۳ کال کې د ترهګرۍ د ملاتړ له امله، چې ویل کېدل په شمالي قفقاز کې اسلامي یاغیانو ته یې ملاتړ ورکاوه، ترهګره ډله وبلله. خو له هغه وروسته چې طالبانو د ۲۰۲۱ په اګست کې پر افغانستان ولکه ټینګه کړه، کرملین له دې ډلې سره خپلې اړیکې پراخې کړې دي.
روسیه یوازینی هېواد نه دی چې د طالبانو په اړه یې خپل دریځ یې بدل کړی. قزاقستان هم تېر کال طالبان د ترهګرو له لیست څخه وایستل، او چین د اقتصادي اړیکو د پراخولو تر څنګ، په ۲۰۲۳ کال کې افغانستان ته نوی سفیر واستاوه.
سره له دې، تر اوسه هېڅ هېواد د طالبانو حکومت په رسمي توګه نه دی پېژندلی، او دا حکومت لا هم له نړیوالې دیپلوماتیکې انزوا سره مخامخ دی، که څه هم په سیمهییزه کچه د تماسونو کچه لوړه شوې ده.