تاند【پنجشنبه د حمل ـ وري ۲۸مه】پاکستانۍ رسنۍ وايي، کابل ته د صادق خان په مشرۍ د پلاوي سفر کې د طالبانو له حکومت سره د ټي ټي پي په تړاو مثبتې خبرې شوې دي.
پاکستاني رسنۍ زیاتوي، چې د طالبانو پخوانی دریځ بدل شوی دی.
د راپورونو له مخې کابل کې د طالبانو حکومت پاکستاني پلاوي ته په یوه ناسته کې ویلي، چې د ټي ټي پي اړوند د اسلام آباد ځینو اندېښنو په تړاو یې «عملي اقدامات» هم کړي دي.
د پاکستاني طالبانو د تحریک پر وړاندې د طالبانو د حکومت د عملي اقداماتو په اړه نور جزییات نه دي ورکول شوي.
بل لورته د طالبانو بهرنیو چارو وزارت له پاکستاني لوري سره تر اوسه پر ټي ټي پي خبرې نه دي تایید کړي.
د پاکستان ځانګړي استازي صادق خان د افغانستان – پاکستان د همغږۍ ګډې کمېټې ناستې په تړاو ویلي، چې د خبرو له لارې د دواړو هېوادونو ښکېلتیا د تاوتریخوالي کمولو او متقابل تفاهم پیاوړتیا لپاره اړینه ده.
د طالبانود حکومت د واکمنۍ په لومړیو کلونو کې کابل ته له ټي ټي پي سره د خبرو او کنټرول کولو لپاره څو پلاوي هم استول شوي وو، خو دا هڅې بې پایلې شوي وې.
د طالبانو حکومت ټينګار کوي چې د ټي ټي پي په ګډون له هېڅ وسله والې ډلې سره اړیکې نه لري، او نه هم اجازه ورکوي، چې د افغانستان خاوره د نورو هېوادونو پر ضد وکاروي.
دا راپورونه داسې مهال ورکول کېږي، چې له دې وړاندې طالبانو په پاکستان کې نا امنۍ او د وسله والو ډلو موجودیت د دغه هېواد کورنۍ موضوع بللې ده.