تاند (پنجشنبه، د وري/ حمل ۲۱ مه) د افغانستان د کرکټ الف لوبډلې د ایرلنډ الف لوبډلې ته په غیررسمي ټیستلوبه کې په یوه پاڼۍ (اننګز) او ۱۹۴ منډو ماته ورکړه.
لومړی افغانستان توپ وهنه یا بیټنګ وکړ او په داسي حال کې چې ۷ لوبغاړي یې سوځېدلي وو، ۶۱۲ منډې وکړې. سره له دې چې افغان لوبډلې لا ۳ لوبغاړي لرل، ایرلنډ ته یې د توپ ویشتنې نوبت ورکړ. ایرلنډي لوبغاړي په داسي حال کې چې ۳۰۹ منډې یې کړې وې، وسوځیدل.
افغان لوبډلې ایرلنډ ته د بل اننګز بلنه هم ورکړه خو هغوی ټول د سیالۍ په درېیمه ورځ په داسي حال کې وسوځېدل چې ۱۰۹ منډې یې کړې وې.
په دې توګه د افغانستان الف الوبډلې د ایرلنډ الف لوبډلې ته په یوه پاڼۍ او ۱۹۴ منډو ماته ورکړه.
په دې غیررسمي ټیستلوبه کې، چې په ابوظهبي کې وشوه، د افغانستان لپاره تر ټولو ډېرې منډې بشیر شاه وکړې. د بشیرشاه له ۱۸۷ منډو وروسته ریاض حسن ۹۴، عمران ۸۵، شمس الرحمن ۸۴، دروېش رسولي ۵۳ او افسر ځاځي ۵۵ منډې وکړې.
عرب ګل په دوهمه پاڼۍ کې د ایرلنډ ۶ لوبغاړي وسوځول. ده په لومړۍ پاڼۍ کې ۴ لوبغاړي سوځولي وو. همداراز ضیاالرحمن په لومړۍ پاڼۍ کې ۴ لوبغاړي سوځولي وو.