تاند【جمعه د حمل ـ وري ۱۵مه】پاکستاني رسنیو خبر ورکړی، چې ناقانونه افغان کډوالو ته د بیرته ستنېدو د مهالوېش پای ته رسیدو وروسته پولیسو ۶۰ افغان کډوال نیولي دي.
اکسپریس ټریبیون ورځپاڼه په یوه راپور کې لیکلي، چې پولیسو پرون پنجشنبه د حمل یا وري په ۱۴مه ۲۲ کډوال په اسلام آباد او ۳۸ کډوال په راولپندي کې نیولي دي.
دغه راز د یوه بل خبر له مخې د پاکستان په کراچۍ ښار کې د افغانستان کونسلګري وایي، چې په کراچۍ ښار کې مېشت ۱۷ تنه افغان کډوال یې د پولیسو له منګولو خوشې او پرته له زنداني کېدو یې خپلو کورنو ته لېږلي دي.
د رسنیو د راپورونو له مخې پرون پنجشنبه د پاکستان په زیاتو ښارونو کې د پولیسو له خوا افغان کډوال نیول شوي.
د پاکستان حکومت د (ای سي سي) او (پي او ار) کارت لرونکو افغانانو ته خبرداری ورکړی، چې د روانې میاشتې تر لسمې نېټې له پاکستانه ووځي.
دغه راز د پاکستان په ټولو ښارونو کې پولیسو د افغان کډوالو پر وړاندې عملیات پېل کړي.