تاند (جمعه، د وري/ حمل ۸ مه) تر ۱۷۰ ډېر افغانان، چې ښځې او ماشومان هم پکې شامل دي، د بیا میشتېدنې لپاره په ځانګړې الوتکه کې له اسلاماباد څخه جرمني ته ولېږدول شول.
ټولټال ۱۷۴ افغان وګړي، په ځانګړي ډول هغه کسان چې له لوړ ګواښ سره مخامخ وو، د مارچ پر ۲۸مه د هانوفر هوايي ډګر ته رسېدلي دي. دې کسانو ته د جرمني حکومت د بیا میشتېدنې ژمنه ورکړې وه.
د دې ۱۷۴ کسانو په منځ کې ۸۲ ښځې او ۹۲ سړي شامل دي، او ۷۴ تنه یې تر ۱۸ کلنۍ کم عمر لري. همداراز، نهه ماشومان چې عمرونه یې تر دوو کلونو کم دي، هم د دې ډلې برخه دي، چې د بیا میشتېدونکو کسانو زیانمنونکي حالت ته اشاره کوي.
د جرمني د کورنیو چارو وزارت ویاند تایید کړې چې تر سفر دمخه، ټول کسان د امنیتي اندېښنو له پلوه په بشپړ ډول ارزول شوي وو. ویاند ټینګار وکړ چې د انتخاب په پروسه کې امنیت تر ټولو لوړ لومړیتوب درلود، څو د بیا میشتېدونکو افرادو خوندیتوب یقیني شي.
د جرمني د بیا میشتېدنې پروګرام د هغو افغانانو لپاره دی، چې د طالبانو تر واکمنۍ وړاندې یې د افغان پوځ یا د جرمني اړوند ادارو سره کار کړی و. دغو کسانو ته د هغوی د پخواني افغان حکومت پر مهال له جرمني سره د همکارۍ له امله لومړیتوب ورکړل شوی.
له دې وروستي انتقال پرته، جرمني د مارچ پر ۵مه هم ۱۳۲ افغان کډوال له پاکستان څخه بېولي وو. د دې لړۍ دوام د هغو افغان وګړو د ملاتړ لپاره د جرمني پراخې هڅې ښيي، چې د ځورونې له خطر سره مخ دي.
د جرمني د بیا میشتېدنې پروګرام لا هم هغو افغانانو ته لومړیتوب ورکوي، چې له بهرنیو ادارو سره د کار له امله خطر ورته پېښېدای شي.
جرمني ته د څه باندې ۱۷۰ تنو نورو افغانانو انتقال ښيي چې د کډوالو ملاتړ ته نړیواله لا هم ژمنه ده.