تاند【سه شنبه د حمل ـ وري ۵مه】نیمروز ولایت د طالبانو ځایي مسئولین وایي، په تېرو لس ورځو کې د نیمروز ورېښمو پله له لارې له ایرانه ۱۵زره افغان کډوال هېواد ته راستانه شوي.
د یاد ولایت کمیسار مولوي نصرالله زیاته کړې چې ، بیرته راستنېدونکو کډوالو ته یې اسانتیاوې برابرې کړې او له کومې ستونزې پرته هېواد ته راستنېږي.
له دې سره هممهاله د ایران د بهرنیو چارو وزیر سید عباس عراقچي د طالبانو له حکومت سره په ګډه له ایرانه د افغان کډوالو راستنېدلو د هوکړې له جوړېدو خبر ورکړی او ټینګار یې کړی چې دواړه هېوادونه د ناقانونه کډوالو پر ستنېدلو هوکړې ته رسېدلي دي.
د ایراني رسنیو د راپورونو له مخې، عراقچي ویلي چې له ایرانه د افغان کډوالو د ستنېدلو لړۍ په «تدریجي او باعزته» توګه روانه ده.
دغه شمېر کډوال داسې مهال هېواد ته راستنېږي، چې پاکستان هم د روانې مارچ میاشتې تر وروستۍ نېټې افغان کډوالو ته وخت ورکړی، څو دغه هېواد پرېږدي.
له همدې امله د ننګرهار کډوالو ریاست د کډوالۍ نړیوال سازمان استازو سره په ګډه ناسته کې، د بیرته راستنېدونکو کډوالو د نوې څپې لپاره د چمتووالي خبر ورکړی دی.