تاند【سه شنبه د حمل ـ وري ۵مه】ټاکل شوې، چې د هند په غوره ليګ کې د افغانستان دوه پیاوړي لوبغاړي يو د بل پر وړاندې لوبه کې سره مخ شي.
د هند ۲۰۲۵ غوره لیګ سیالیو کې نن د ګجرات لوبډله، چې دوه افغان لوبغاړي راشد خان او کریم جنت له ځان سره لري، د پنجاب لوبډلې پر وړاندې چې عظمت الله عمرزی یې غړی دی، د دغه کال لومړۍ لوبه ترسره کوي.
دغه لوبه نن سه شنبه ماښام د افغانستان پر وخت ۶ بجې پيلېږي.
تر دې وړاندې بل افغان لوبغاړي نوراحمد لکڼوال د چینای لپاره په خپله لومړۍ لوبه کې یادې لوبډلې ته بری ور په برخه کړ.
لکڼوال د ۴ اورونو په ترسره کولو ۱۸ منډې ورکړې او ۴ لوبغاړي یې د خپلې لوبډلې په ګټه اوټ کړل.
نوموړی په یاده لوبه کې غوره لوبغاړی شو.
په دې سیالیو کې رحمن الله ګربز، مجیب ځدراڼ او فضل الحق فاروقي هم له بیلابیلو لوبډلو سره لوبېږي.