تاند (دوشنبه، د وري/ حمل ۴ مه) په پاکستان کې د دولت یوه وسله واله مخالفه ډله ادعا کوي چې د بلوچستان ایالت په بیلابیلو سیمو کې یې د پاکستان پر پوځ اووه بریدونه کړي دي.
د بلوچستان د ازادۍ پوځ په نوم بېلتون غوښتونکې ډلې تېره شبه په یوه خبرپاڼه کې ویلي چې د بلوچستان په تربت، تومپ او پنجګور کې لارې او عمومي سړک بند کړی، ۵ پوځیان یې وژلي او ۱۳ نور یې ټپیان کړي دي.
په خبرپاڼه کې همداراز ادعا شوې چې دوی تېره شپه د پنجګور په سارادوک سیمه کې د پوځ پر یوه مرکز له دوو خواوو بریدونه کړي او د دې یو نیم ساعته جګړې په ترڅ کې د پوځ درې سرتیري وژل شوي او لږترلږه ۴ نور ټپیان شوي دي.
د بلوچستان د ازادۍ پوځ همداراز وايي چې تېره شپه یې ځواکونو د پنجګور په واشبود سیمه کې عمومي سړک بند کړ او په ساعتونو یې تلاشي اخیستې ده.
دوی همداراز په څو نورو ځایونو کې د بریدونو ادعا کړې ده.
د پاکستان پوځ تراوسه پورې د بلوچستان د ازادۍ پوځ د دې تازه ادعاوو په اړه څه نه دي ویلي.