تاند (جمعه، د کب/ حوت ۲۴ مه) وروسته له دې چې د (کې جي بي) پخواني ایجنټ الینور موسایف په یوه فیسبوک پوسټ کې ادعا وکړه چې ډونالډ ټرمپ په ۱۹۸۷ کال کې د “کراسنوو” په مستعار نوم د مسکو له خوا جذب شوی و، دې موضوع په ټولنیزو رسنیو کې پراخ غبرګونونه وپارول. موسایف ویلي چې ټرمپ په ۱۹۸۷ کال کې، کله چې هغه ۴۰ کلن و، د مسکو د سفر په ترڅ کې د KGB له خوا جذب شوی و.
دا ادعاوې په داسې حال کې شوي چې ټرمپ د خپل واک د لومړۍ دورې په شان دا ځل هم د روسیې په اړه خورا نرم او مثبت دریځ غوره کړی دی، د اوکراین ولسمشر ولادیمیر زیلینسکي یې “ډیکټاټر” بللی، له اوکراین سره د متحدو ایالتونو مرستې یې بندې کړي، او د امریکا-روسیې د اړیکو د بیا تنظیمولو وړاندیز یې کړی دی.
له دې ادعاوو سره سره، د رابرت مولر په مشرۍ ژوره پلټنه وشوه چې په پایله کې یې څو تورونه ولګول شول، خو ټرمپ په خپله هیڅکله دله روسیې سره په همکارۍ تورن نه شو.
د کې جي بي د پخواني ایجنټ یوري شویټس په وینا، ټرمپ په ۱۹۸۷ کال د مسکو د سفر په لړ کې د KGB له خوا جذب شوی و. شویټس ادعا کوي چې ټرمپ له ۱۹۷۷ کال راهیسې، له کله چې له ماډلې، ایوانا زلنیکووا سره یې واده کړی، په احتمالي ډول د روسیې له استخباراتو سره همکاري کوي.
په ورته وخت کې، د ۱۹۸۷ کال په جولای کې ټرمپ مسکو ته سفر وکړ، چې احتمال لري تر څار لاندې و، خو هلته یې هیڅ پروژه پیل نه کړه.
له دې ټولو ادعاوو سره سره، ټرمپ په پرله پسې ډول دا تورونه رد کړي چې ګواکې هغه د روسیې لپاره کار کړی دی.
په ټولنیزو رسنیو کې، ځینو کاروونکو پر ټرمپ ملنډې وهلې، لکه د هغه عکس یې د KGB په یونیفورم کې خپور کړی او دا شعار یې ورته لیکلی چې د مسکو جاسوس پر امریکا حکومت کوي.
همدارنګه، ځینو سیاستوالو، لکه د بریتانیا محافظه کار ګوند غړي ګراهام سټوارټ، په ټویټر کې لیکلي: “موږ باید دا احتمال په پام کې ونیسو چې ولسمشر ټرمپ د روسیې همکار دی.”
سره له دې ادعاوې چې په پراخه کچه خپرې شوي، تر اوسه پورې کره شواهد نه دي وړاندې شوي، او ټرمپ په پرله پسې ډول دا تورونه رد کړي دي.