تاند(پنجشنبه، د کب/ حوت ۲۳ مه) ملګرو ملتونو په خپل تازه راپور کې اعلان کړی چې اسراییل د غزې د جګړې په لړ کې په سیستماتیک ډول د ښځو د روغتیايي مرکزونو په ورانولو او د جنګي ستراتیژۍ په توګه له جنسي تاوتریخوالي څخه په استفادې د فلسطینیانو نسل وژنه کړې ده.
د ملګرو ملتونو د نړیوالې پلټنې خپلواک کمېسیون په دې راپور کې، چې د پنجشنبې په ورځ، د کب ۲۳ مه خپور شو، ټینګار کړی چې اسراییل له حماس سره د جګړې پر مهال، «د فلسطینیانو د تولید مثل (زوکړې) ظرفیت یوه برخه د ولادي نسايي روغتیا د سیستماتیکې ورانونې له لارې له منځه وړې ده.»
د اسراییل د افراطي صدراعظم بنیامین نتانیاهو دفتر دا راپور “ناسم او بې اساسه” بللی. همداراز، په جینیوا کې د اسراییل دایمي استازولۍ د ملګرو ملتونو د کارپوهانو دا تورونه “بېبنسټه، مغرضانه او غیرمعتبر” ګڼلي دي.
د ملګرو ملتونو تحقیقاتي کمېسیون ویلي چې اسراییل “په قصدي توګه” د غزې د فلسطینیانو د زېږون لوی مرکز په نښه کړی، او په ورته وخت کې یې په محاصره کړې غزه کې، روغتیایي مرکزونه تړلي او د حیاتي طبي مرستو، دارو درملو، د خوندي زېږون، او د نویو زېږېدلو ماشومانو د پاملرنې لپاره اړینو توکو ته د لاسرسي مخه نیولې ده.
راپور زیاتوي چې د اسراییل دا اقدامات، د میندو د مړینې له زیاتوالي سره یو ځای، چې د طبي وسایلو د محدودیدو له امله رامنځته شوی، د “بشریت ضد جنایت” ګڼل کېږي، چې موخه یې “د فلسطینیانو د یوې ډلې په توګه له منځه وړل” دي.
راپور همداراز اشاره کړې چې د غزې روغتونونه، د زېږون څانګې، او د مصنوعي القاح مرکزي مرکز په سیستماتیک ډول ویجاړ شوي دي.
د ملګرو ملتونو کمیسیون وايي، دوی دې پایلې ته رسېدلي چې د اسراییل امنیتي ځواکونو “په قصدي توګه” د غزې مرکزي زېږنتون په نښه کړی او “ټول هغه مواد، چې د فلسطینیانو د راتلونکي نسل د تولید لپاره ذخیره شوي وو، له منځه وړي دي.”
د پلټونکې کمېسیون په وینا، دا “بېساري جنایتونه” نه یوازې ښځو او نجونو ته “شدید جسمي او رواني زیانونه او سخت دردونه” اړولي، بلکې دا به د فلسطینیانو د رواني روغتیا او د هغوی د تولید مثل په راتلونکو فرصتونو “نه جبرانېدونکې” اغېزې ولري.
دا درې کسیز خپلواک پلټونکی کمېسیون د ۲۰۲۱ کال په مې میاشت کې د ملګرو ملتونو د بشري حقونو شورا له خوا د دې لپاره جوړ شو چې په اسراییل او فلسطیني سیمو کې د نړیوالو قوانینو احتمالي سرغړونې وڅېړي.
راپور همداراز اسراییلي ځواکونه تورن کړي چې دوی په “عام محضر کې د فلسطینیانو جبري بربنډول او جنسي ځورونه د خپلو معیاري عملیاتو د برخې په توګه کارولي” څو فلسطینیان د حماس تر مشرۍ لاندې د ۲۰۲۳ کال د اکتوبر له بریدونو وروسته مجازات کړي.
د فلسطین د اشغالي سیمو لپاره د ملګرو ملتونو د خپلواک کمېسیون مشره، ناوي پیلای، وايي: “هغه شواهد چې کمیسیون راټول کړي، د جنسي او جنسیتمحوره تاوتریخوالي د زیاتوالي یو خواشینوونکی انځور وړاندې کوي.”
نوموړې زیاته کړې: “هیڅ شک نشته چې اسراییل د فلسطینیانو د بېرولو او د هغوی د خپلواکۍ د حق د کمزوري کولو لپاره له جنسي تاوتریخوالي او جنسیتمحوره ظلم څخه د یوې ځپونکې وسیلې په توګه کار اخیستی.”
کمیسیون له قربانیانو او شاهدانو سره مرکې کړې، عکسونه او ویډیوګانې یې تحلیل کړي، څو د دې تورونو کره ثبوتونه راټول کړي.
د کمېسیون موندنې د ۲۰۲۳ کال د اکتوبر له اوومې نېټې وروسته د غزې تړانګه، د لوېدیځې غاړې اشغالي سیمې، او ختیځ بیتالمقدس پوښلي دي.
په هماغه ورځ، د حماس وسلهوالې ډلې او نورو فلسطیني وسلهوالو پر اسراییل پراخ بریدونه ترسره کړل، چې په پایله کې یې شاوخوا ۱۲۰۰ کسان ووژل شول او نژدې ۲۵۰ تنه وتښتول شول.
د دې بریدونو په ځواب کې، اسراییل پر غزه بریدونه پیل کړل، چې د غزې د روغتیايي چارواکو د شمېرو له مخې، تر اوسه پورې یې تر ۴۸ زره زیات فلسطینیان وژلي او د دې سیمې شاوخوا ۹۰ سلنه بنسټیزې زېربناوې یې ویجاړې کړي دي.
That was Palestinians Shia terrorist groups like Hamas Hezbullah & Lewa y Fatemioun whom attacked Israel & killed hundreds of innocent civilians and commented crimes against humanity, Why they provoked Israel?
د ظلم د انحرافی توجیه د جرم مجازات د ظلم د جرم تر مجازات په کمه نه ده.