تاند (چهارشنبه، د کب/ حوت ۲۲ مه) د بلوچستان د ازادۍ پوځ، چې ګڼ شمېر کسان یې له یوه ریلګاډي کوز کړي او برمته کړي، وايي چې د پوځ یرغل دوام لري، د بندیانو تبادلې ته هیڅ جدي توجه نه لري او دوی به ۱۰ نور یرغمل ووژني.
د بلوچستان د ازادۍ پوځ پرون (سې شنبې) د بولان په ډهاډر کې له جعفر ایکسپریس ریلګاډي څخه سلګونه سپرلۍ کښته کړې، د هغوی له منځه یې ښځې، ماشومان او بلوڅان خوشی کړل او تر یو نیم سل ډېر نور کسان یې په دې نوم چې د پوځ او استخباراتو کسان دي، له ځان سره بیولل.
د بلوچستان دې بېلتون غوښتونکې ډلې په عین حال کې پرون خبرداری ورکړ چې که د پاکستان پوځ د یرغملو د خلاصون هڅه وکړي، برمته کسان به ووژني.
له بلې خوا د بلوچستان ایالتي حکومت پرون ناوخته وویل چې د یرغملو د خوشي کولو لپاره ځواکونه استول شوي دي.
تېره شبه ناوخته د بلوچستان د ازادۍ پوځ په یوه خبرپاڼه کې اعلان وکړ:«د پاکستان اشغالګر پوځ یو ځل بیا د بلوڅ آزادي غوښتونکو جنګیالیو پر ضد غیرمسوولانه او احمقانه پوځي یرغل کړی، د بې پیلوټه الوتکو بریدونه یې کړي او دوه توغندي یې توغولي دي. خو د بلوڅ جنګیالیو چټکتیا، غوره دفاعي تاکتیکونه، او د جګړې پر ډګر بشپړ کنټرول له امله، ټول جنګیالي خوندي پاتې شول. دا برید څرګند ثبوت دی چې پاکستان د بندیانو د تبادلې په اړه د کومې جدي پریکړې وړتیا نه لري، بلکې یوازې د جګړې د لېونتوب او سرزوري تر اغېز لاندې اقداماتو ته دوام ورکوي.»
دې بېلتون غوښتونکې ډلې همداراز ویلي چې «که اشغالګر پوځ زموږ وروستي خبرداری ته پاملرنه ونه کړي، د پایلو مسوولیت به یوازې د پاکستان پر غاړه وي. د ننني بزدلانه او بېځایه بمبارۍ په ځواب کې، ۱۰ نور یرغمل شوي کسان به له منځه یووړل شي.»
د بلوچستان د ازادۍ پوځ همداراز ویلي چې د دې عملیاتو په ترڅ کې یې هیڅ جنګیالی وژل شوی نه دی.
دې بېلتون غوښتونکې ډلې نه دي ویلي چې د برمته وو د خلاصون لپاره د خپلو کومو یا څومره کسانو د خلاصون غوښتنه لري.