تاند (جمعه، د کب/ حوت ۱۰ مه) د طالبانو تر کنټرول لاندې د افغانستان سترې محکمې نن (جمعه) اعلان وکړ چې سبا (شنبه) د روژې میاشتې لومړۍ ورځ ده.
د طالبانو حکومت د افغانستان د پخوانیو حکومتونو خلاف، چې له شاوخوا سلو کلونو راهیسي یې له سعودي عربستان سره په یو وخت روژه او اختر کاوه، له سعودي په خپلواک ډول روژه او اختر اعلانوي.
د پاکستان او ایران په شمول یو شمېر نور هیوادونه هم په روژه او اختر کې د سعودي عربستان تقلید نه کوي.
د طالبانو د سترې محکمې په خبرپاڼه کې ویل شوي چې په کندهار، کابل، فاریاب، پکتیا، او زابل ولایتونو کې څو تنو میاشت لیدلې او محکمو د هغوی شاهدي تایید کړې ده.
تر دې وړاندې سعودي عربستان هم اعلان کړی چې سبا (شنبه) د روژې د مبارکې میاشتې لومړۍ ده.