تاند (دوشنبه، د کب/ حوت ۶ مه) د تورخم دروازه نن درېیمه ده چې لا هم بنده ده او دواړو خواوو ته یې سلګونه باري موټر او ډېر شمېر مسافر بند او منتظر پاته دي.
د منتظرو کسانو په منځ کې ډېر شمېر ناروغان، ښځې او ماشومان هم شامل دي.
د پاکستان یو امنیتي چارواکي د تورخم بندر په اړه وویل چې لاهم د سرحدي اړیکو کمېټې، چې په کرښه د ستونزو د راپورته کېدو په مهال غونډې او مشورې کوي، د دې لارې د بیا پرانیستلو پهاړه ناسته نه ده کړې.
د پاکستان دغه امنیتي چارواکي د خپل هیواد رسنیو ته همداراز ویلي چې د دواړو هېوادونو امنیتي ځواکونه د تیارسی په حال کې دي.
دا مځکنی بندر، چې د خیبر پښتونخوا ایالت د افغانستان له ننګرهار ولایت سره نښلوي، د شنبې په ورځ د یوې نوې امنیتي پوستې د جوړولو پر سر د اختلاف له امله پاکستان بنده کړه.
د پاکستان “ډان” ورځپاڼې ته سرچینو ویلي چې د سرحدي امنیتي مقاماتو ترمنځ د افغانستان په اړخ کې د یوې امنیتي پوستې د ترمیم او پراخولو، او د پاکستان خوا ته د لارښوونکې لوحې د لګولو پر سر شخړه رامنځته شوې، چې له امله یې بندر ناڅاپه تړل شوی دی.
سرچینې وايي چې دواړو خواوو مخکې هوکړه کړې وه چې په سرحدي سیمو کې د هر ډول ودانیزو کارونو یا سرحدي جوړښتونو د بدلون په اړه باید یو بل ته خبر ورکړي.
دوی زیاتوي چې د ګمرک او مهاجرت دفترونه تړل شوي او کارکوونکو ته ویل شوي چې له خپلو ځایونو لاړ شي.
سرچینو ډان ته دا هم ویلي چې پاکستان اجازه ورکړې چې د شپږ تنو مړي، چې په پاکستان کې وفات شوي وو، جنازې افغانستان ته ولړول شی.