تاند【دوشنبه د کب ـ حوت ۶مه】د طالبانو د حکومت د لوړو زده کړو وزارت نن دوشنبه د کابل پولي تخنیک پوهنتون کې د اوبو نړېوال کنفرانس رابللی دی.
سرچینې وایي چې، دې کنفرانس کې د طالبانو د لوړپوړو چارواکو تر څنګ کورني او بهرني متخصصین هم ګډون کوي.
ویل کېږي چې، په دې کنفرانس کې د افغانستان اوبیزو سرچینو مدیریت، ارزښت، مهار او د اوبو اړوند نورو موضوعاتو خبرې وشي.
د یادونې ده چې، تر دې وړاندې د ننګرهار پوهنتون کې د اقلیمي بدلون نړېوال کنفرانس رابلل شوی و، چې د ګڼ شمېر هېوادونو متخصصینو د اقلیمي بدلون حل لارو په اړه په کې خپلې مقالې وړاندې کړې.
افغانستان د اوبو له پلوه غني هېواد دی خو د وخت حاکمو نظامونو د ناپامۍ له امله تر اوسه نه دي مدیریت شوي او نورو ګاونډیو هېوادونو ته بې بها روانې دي.
افغان متخصصین وایي که د افغانستان په داخل کې اوبه مهار او سمه ګټه ترې واخیستل شي نو په داخل کې به د کرنیزې برخې د غني کېدا ترڅنګ د برېښنا تولید دومره زیات شي چې د نورو هېوادونو له احتیاجه به مو خلاص کړي.