تاند【دوشنبه د کب ـ حوت ۶مه】نن دوشنبه( د کب شپږمه ) په ختیځ زون کې د پولیو يا ګوزڼ واکسین کمپاین پیل شو.
مسوولان وایي دغه کمپاین به څلور ورځې دوام وکړي.
د پولیو په اړه د عامه پوهاوي په يوه ورکشاپ کې روغتیایي چارواکو ویلي، چې په دې کمپاین به د ختیځ زون یو میلیون او ۳۰۶ زره له ۵ کلونو کم عمره ماشومان واکسين شي.
ننګرهار کې د طالبانو د پوهنې، حج او اوقافو، امربالعمروف، امنیه قومندانۍ او بېلابېلو نورو ادارو مسوولینو بیا ويلي؛ د پولیو واکسین له کارکوونکو سره همکار دي او هڅه به وکړي، چې د پولیو په اړه عامه پوهاوی د دغه ولایت وګړو ته ورسوي.
د روغتیا نړیوال سازمان (WHO) او نورو نړیوالو روغتیايي ادارو د معلوماتو له مخې، پولیو په ټوله نړۍ کې نږدې ختم شوی دی، خو لا هم په ځینو برخو کې د امنیتي مشکلاتو، د واکسین رسولو محدودیتونو او ځینې نور عواملو له کبله دا ناروغي دوام لري.
افغانستان او پاکستان دوه هغه هېوادونه دي چې وګړي یې د پولیو له لاعلاجه ناروغۍ ځورېږي.
د پولیو د ختمولو لپاره نړیوالې هڅې روانې دي او د واکسینونو پراخ توزیع او د عامه پوهاوي زیاتولو له لارې د دې ناروغۍ په وړاندې دوامداره مبارزه کیږي.