تاند (یکشنبه/ د کب / حوت ۵ مه) ټاکل شوې ده چې د افغانستان بانک نن (یکشنبې، د فبرورۍ ۲۳مه،) د افغانۍ د ارزښت د ثبات لپاره ۲۰ میلیون ډالر لیلام کړي.
د افغانستان بانک پرون (شنبې) په یوه خبرپاڼه کې ټولو صرافانو او تجارتي بانکونو ته بلنه ورکړې چې په دې داوطلبۍ کې برخه واخلي.
بانک ټینګار کړی چې بریالي ګډونوال باید د هماغې ورځې تر پایه خپلې مالي چارې تصفیه کړي.
د افغانستان بانک جوته کړې چې جزوي راکړې ورکړې به نه منل کېږي، او ګټونکي باید په ټاکلي وخت کې ټولې پیسې نغدي یا د بانک له لارې تحویل کړي.
د افغانستان بانک د جنورۍ له میاشتې څخه، چې د امریکا حکومت وویل چې افغانستان ته مرستې کموي او په نتیجه کې یې د افغانۍ ارزښت یو څه ولوېد، پر له پسې ډالر لیلاموي څو د افغانۍ ارزښت ثابت وساتي.
که څه هم د افغانستان بانک د طالبانو له بیا واک ته رسیدو وروسته تقریباً هره اوونۍ یوه اندازه ډالر لیلاموي، خو په وروستیو کې، چې د افغانیو په ثبات کې څپڅپانتیا راغلې، تر پخوا ډېر ډالر لیلاموي.
پرون (شنبې) د اسعارو د تبادلې په بازار کې هر ډالر په ۷۳.۷۹ افغانۍ تبادله کېده.
تمه کېږي چې نن د ۲۰ میلیون ډالره له لیلامېدو سره به د افغانۍ ارزښت لږ نور هم لوړ شي.