تاند (شنبه/ د کب/ حوت ۴ مه) د اتلانو په جام (چمپینز ټرافي) کې نن په بي ګروپ کې د استرالیا لوبډلې په حیرانوونکي ډول د انګلیستان ټیم ته په ۵ ویکټونو او ۱۵ اضافي توپونو ماته ورکړه.
انګلیستان د ۸ لوبغاړو د سوځېدو او ۵۰ اورونو په پای کې ۳۵۱ منډې وکړې. ګومان نه کېده چې استرالیا دې دا لوړ هدف پوره کړای شي.
په پیل کې د استرالیا لومړني دوه لوبغاړي په داسي حال کې وسوځېدل چې ۲۰ منډې یې لا نه وې کړي، دې شي د استرالیا د ماتې په اړه باور لا زیات کړ خو د استرالیا نور لوبغاړي واخطا نه شول او په تدریج یې د لوبې نتیجه د ځان په ګټه واړوله.
په دې سیالۍ کې د انګلیستان پیلګر لوبغاړي بین دوکیټ خورا ښه بیټنګ وکړ. ده په ۱۴۳ توپونو ۱۶۵ منډې وکړې. خو د استرالیا لپاره بیا جوش لینګلس په ۸۶ توپونو ۱۲۰ منډې وکړې.
ټاکل شوې ده چې سبا د هند او پاکستان لوبډلې د متحده عربي اماراتو په دوبۍ کې مخامخ شي.
د هند او پاکستان سیالي، تل د دوو هیوادونو ترمنځ د اختلافاتو له کبله حساسه ګڼل کېږي. او یوه له هغو سیالیو څخه ګڼل کېږي چې د لیدو مینه وال یې ډېر دي.