تاند (سې شنبه، د کب/ حوت ۱۴مه) د «کلایمت ایمپلس» پروژې پرمختیايي ډلې اعلان وکړ چې د داسي الوتکې په جوړولو او ډیزاین کولو کې یې پرمختګ کړی چې په اوبلن هایدروجن چلیږي.
دا پروژه د هوايي چلند په صنعت کې انقلاب راوستلی شي.
د هوايي چلند د صنعت بدلون
برتران پیکار، چې د هوايي چلند له مخکښانو څخه دی، له خپلو همکارانو سره په فرانسه کې د اتلانتیک سمندر پر غاړه په یوه ورکشاپ کې پر داسې الوتکې کار کوي چې د هوايي چلند صنعت ته نوی لوری ورکولی شي.
لس کاله وړاندې، پیکار په دې هدف د لمر پر بریښنا د چلیدونکې الوتکې په وسیله تر نړۍ راوڅرخېده، چې د اقلیمي بدلون بحران ته د خلکو پام را واړوي. سره له دې چې دې سفر پراخ انعکاس درلود، خو د هوايي چلند په صنعت کې یې کوم لوی بدلون رانه وست.
اوس دا ۶۶ کلن سویسي څېړونکی غواړي یو بل ګام واخلي او دا ځل د خورا سوړ مایع هایدروجن په کارولو سره داسي الوتنو ته لار ومومي چې چاپېریال ته ضرر نه لري.
بې دمې تر دنیا راګرځېدل
د «کلایمت ایمپلس» پروژې څېړونکي، چې د تیر کال له فبرورۍ کار پیل کړی، پلان لري چې یوه دوهکسیزه الوتکه، چې سونګ یې شین هایدروجن وي، په ۹ ورځو کې پرته له تم کیدو، د نړۍ شاوخوا راوګرځوي.
شین هایدروجن د اوبو د مالیکولونو د تجزیې له لارې له بادي یا لمریزې بریښنا څخه تولیدېږي، چې دا پروسه الکترولیز نومېږي.
د دې الوتکې جوړونکي ټیم، چې د ایربس شرکت او د بلجیکي «سولوي» څېړنیز مرکز ملاتړ ورسره دی، د خپلو پرمختګونو راپور وړاندې کړ.
«کلایمت ایمپلس» کله الوتنه کوي؟
د دې الوتکې لومړنۍ ازمیښتي الوتنې د راتلونکي کال لپاره پلان شوي، خو د نړۍ له شاوخوا څخه به تر ۲۰۲۸ کال پورې نه راڅرخي.
د الوتکې ځانګړتیاوې:
- د ایربس A320 په اندازه (۳۴ متره اوږدوالی)
- ۵.۵ ټُنه وزن
- په ساعت کې ۱۸۰ کیلومتره سرعت
- لوړوالی / ارتفاع ۳ زره متره
هایدروجن سونګ او تخنیکي ننګونې
دا الوتکه د خورا سوړ مایع هایدروجن د مدیریت لپاره ځانګړي ټانکونه لري، چې تر وزرونو لاندې ځای پر ځای شوي. هایدروجن له دې ټانکونو څخه ازادېږي، د سونګ حجرو ته داخلیږي، هلته بریښنا تولیدوي، او بیا د الوتکې انجن چلوي.
لویې تخنیکي ننګونې:
- د اوبلن هایدروجن ټیټه درجه (-۲۵۳ سانتيګراد) وساتل شي.
- د سونګ موثره کارونه مدیریت شي.
- د لیکو مخنیوی، ځکه چې مایع هایدروجن ډېره اور اخيستونکې ماده ده.
د هایدروجن الوتنو راتلونکی؟
هایدروجن تراوسه د فضايي راکټونو لپاره کارول شوی، خو د سوداګریزو الوتکو لپاره یې کارونه نوی پرمختګ دی.
د رولند برګر مشورتي شرکت د هوايي چلند متخصص نیکیل ساچدوا، وايي:
«د هوايي چلند صنعت لا تر اوسه هغه انقلاب نه دی تجربه کړی، لکه ټیسلا چې د موټر جوړولو صنعت ته راوست.»
سره له دې، چې د مایع هایدروجن کارونه تخنیکي ستونزې لري، خو پیکار ټینګار کوي چې باید دا لاره وازمويل شي، څو د هوايي چلند راتلونکی چاپېریال ته دوستانه شي (یعني چاپېریال ته مضره نه وي).