تاند (شنبه، د تلې/ میزان ۵ مه) میټا وايي نوي په مصنوعي ځیرکتیا سمبال نوي وسایل یې د دې لپاره جوړ کړي چې «د مینې موندل اسانه کړي».
دغه شرکت غواړي د فیسبوک د ډیټینګ (Dating) ځانګړتیا د مصنوعي ځیرکتیا د مرستیال په مرسته پیاوړې کړي، څو خلک وکولی شي د خپل ژوند ملګری/ملګرې تر پخوا اسانه ومومي.
میټا په همدې اوونۍ کې اعلان وکړ چې د ډیټینګ مرستیال» او «جالب ملاقات » (Meet Cute)، د دوو نویو ځانګړتیاوو، په مرسته به د کاروونکو د ستړیا مخه ونیسي.
فیسبوک ډیټینګ د فیسبوک دننه یو وړیا د اړیکو موندلو خدمت دی. د شرکت په وینا، هدف یې دا دی چې «د هغو کسانو په منځ کې چې ګډې علاقې لري د پیژندګلوۍ او د خبرو پیلول اسانه کړي.»
د بېلګې په توګه، کاروونکی کولی شي له نوي ډیټینګ مرستیال څخه وغواړي چې «د بروکلین یوه نجلۍ چې په ټکنالوژۍ کې کار کوي» ورته پیدا کړي. دغه مرستیال همداراز د پروفایل په جوړولو او ښه کولو کې مرسته کولی شي.
له بلې خوا، د Meet Cute ځانګړتیا هره اوونۍ د الګوریتم له مخې کاروونکو ته د «حیرانوونکي ملاقات» وړاندیز کوي.
د مصنوعي ځیرکتیا ځانګړتیاوې تر دې مخکې نورو ډیټینګ اپلیکیشنونو ته هم داخلې شوې دي. د Match Group ټکنالوژۍ شرکت، چې د «ټینډر» (Tinder) او «هینج» (Hinge) مالک دی، د AI پانګونه زیاته کړې او له روباتونو څخه د کاروونکو د روزنې، د پیغامونو د لیکلو او ان د مناسبو عکسونو د ټاکلو لپاره کار اخلي.
د «بامبل» (Bumble) د ډیټینګ اپلیکیشن بنسټ ایښودونکې ویتنای وولف هرد تېر کال وړاندیز کړی و چې په راتلونکي کې کېدای شي د AI پر بنسټ شخصي ډیټینګ مرستیالان حتی د ریښتینو کاروونکو پر ځای لیدنو ته ولاړ شي او له نورو AI مرستیالانو سره تعامل وکړي، څو د خلکو د مطابقت کچه وازمایي.