تاند (پنجشنبه، د سلواغې/ دلوې ۲۵ مه) په اسټرالیا کې د دوو نرسانو دندې وروسته له هغه د تل لپاره وځنډول شوې چې یوه ویډیو خپره شوه، چې په هغه کې دوی اسراییلي ناروغان ګواښي او وايي چې د اسراییلي ناروغانو درملنه نه کوي.

دا سړی او ښځه، چې په سیډني کې د یو روغتون نرسان وو، اوس د نیو ساوت ویلز د ایالتي پولیسو له‌خوا د ګواښوونکو او یهود ضد څرګندونو په تور تر تحقیقاتو لاندې دي.

د اسټرالیا رسنیو د نارینه نرس هویت “احمد رشاد نادر” ښوولی، چې په ۱۲ کلنۍ کې له افغانستان څخه له خپلې کورنۍ سره اسټرالیا ته کډوال شوی و. راپورونه وايي چې د هغه د ښځینه همکارې نوم “سارا ابولبده” دی.

د دوی ویډیو لومړی د “مکس ویفر” په نوم د یوه اسراییلي محتوا جوړونکي له‌خوا په ټیک‌ټاک کې خپره شوې وه.

دا ویډیو د “چت‌رولتکا” (Chatruletka) په نوم د یوه انلاین چټ‌پلېټفارم له لارې له مختلفو کسانو سره مکالمې ښيي. دا پلتفارم خلک په تصادفي ډول سره وصلوي.

د ویډیو په پیل کې، چې په یوه روغتوني چاپېریال کې ثبت شوې، یو سړی چې ځان ډاکټر معرفي کوي، مکس ویفر ته وايي: “ستا سترګې ښکلي دي”، خو بیا زياتوي: «زه بخښنه غواړم چې ته اسراییلی یې.»

بیا هغه وايي چې اسراییلیان «جهنم ته استوي.» وروسته یې ښځینه همکاره مکالمې ته ننوځي او مکس ویفر ته وايي: «یوه ورځ به ستا وار هم راشي، او ته به تر ټولو وحشتناکه مرګ تجربه کړې. کله چې د مرګ شېبه درشي، زه غواړم زما څېره در په یاد شي، تر څو پوه شې چې څرنګه په بد حالت کې مړه کېږې.»

ویفر له دوی پوښتي که یو اسراییلی ناروغ د درملنې لپاره د دوی روغتون ته راشي، څه به وکړي؟ د نادر همکارې ځواب ورکوي: «زه به د هغوی معالجه نه کوم، زه به یې ووژنم.»

نادر بیا د خبرو په دوام کې خپله ګوته ستوني ته نیسي او د سر پرېکولو اشاره کوي او وايي:«ته نه پوهېږې چې څو اسراییلي سپي دې روغتون ته راغلي، او ما هغوی جهنم ته ولېږل.»

د اسټرالیا صدراعظم، انتوني البانیزي، دا ویډیو «شرموونکې او د کرکې وړ» بللې ده.