تاند【پنجشنبه د سلواغې ـ دلوې ۲۵مه】سمنګان ولایت کې د طالبانو د امنیه قومندانۍ ویاند حشمت الله رحماني وایي، د دغه ولایت د دره صوف بالا ولسوالۍ اړوند د ډبرو سکرو په یوه کان کې د میتان ګازو چاودنه کړې ده.
سرچینه زیاتوي، چې دا چاودنه پرون (چهارشنبه د سلواغې ۲۴مه) شوې ده، چې له امله یې درې کان کېندونکي مړه شوي دي.
رحماني زیاته کړې چې د دغو کسانو جسدونه له ویجاړو را ایستل شوي او کورنیو ته یې سپارل شوي دي.
د یادونې ده چې کابو لس ورځې وړاندې د دلوې په ۱۵مه د سمنګان د یاد ولایت په «دره صوف» ولسوالۍ کې د ډبرو سکرو د کان نړېدو له امله دوه کانکیندونکي مړه شوي وو.
د سمنګان په ګډون تر دې مخکې هم د هېواد په بېلابېلو ولایتونو کې د کانونو د نړېدو او په کان کې د چاودنو له امله لسګونه کسانو ژوند بایللی.
د ویلو ده چې په افغانستان کې د کانونو غیرمعیاري ایستنه د ورته پېښو لامل بلل کېږي او سمنګان د هېواد یو له هغو ولایتونو دی، چې په زیاته پیمانه طبیعي زېرمې لري او سلګونه کسان یې په کانونو کې په کار بوخت دي.