تاند (چهارشنبه، د سلواغې/دلوې ۲۴ مه) د ایرانخودرو په نوم د ایران د موټر جوړولو شرکت او افغان اتومبیل ترمنځ د لاسلیک شوي قرارداد له مخې، له راتلونکي کال څخه به درې زره ایراني (سمند) موټر افغانستان ته صادر شي.
د دې هوکړې له مخې، د دغو موټرو لویه برخه به د کابل او هرات په ټکسي سیستم کې وکارول شي.
د دې قرارداد ارزښت ۴۲.۵ میلیون ډالره اعلان شوی دی. ایراني رسنیو دا اقدام د دواړو هېوادونو ترمنځ د موټرو د صنعت په برخه کې د سوداګریزو همکاریو د پراخوالي نښه بللې ده.
د افغان اتومبیل شرکت هم ویلي چې غواړي په راتلونکي کې د خپلو اړتیاوو لویه برخه له ایرانخودرو شرکت څخه پوره کړي.
دا قرارداد په داسې حال کې لاسلیک شوی چې د ګڼو بهرنیو برانډونو له وتلو وروسته، په افغانستان کې د ارزانو موټرو تقاضا زیاته شوې ده.
د بهرنیو موټرو د اخیستلو د توان کمېدو، جغرافیوي نژدېوالي، او د تولید مناسب لګښت ته په کتو، ایراني موټر جوړونکي هیله لري چې د افغانستان په بازار کې به ځان ته د پام وړ ځای ومومي.
خو دا په داسي حال کې ده چې ایراني موټر په خپل هیواد کې ډېر بریالي نه دي ځکه چې بندیزونو د ایران د نورو برخو په شان د موټر جوړونې صنعت هم اغېزمن کړی دی.