تاند (سې شنبه، د سلواغې/ دلوې ۱۶ مه) د ملګروملتونو امنیت شورا په یوه بیان کې تایید کړه چې د طالبانو د حکومت د کورنیوچارو وزیر سراج الدین حقاني ته یې د سعودي او متحده عربي اماراتو د سفر اجازه ورکړې ده.
ښاغلی حقاني د ګڼ شمېر نورو طالب مشرانو ترڅنګ د ملګروملتو د بندیزونو په هغه لیست کې شامل دی چې بهر ته یې سفر منع دی.
ملګروملتونو ویلي چې امنیت شورا د جنوري په ۲۲مه د دوی هغه غوښتنه تایید کړه چې حقاني ته د ۲۰۲۵ کال د جنورۍ میاشتې له ۲۳مې څخه د فبرورۍ تر درېیمې پورې د سفر اجازه ورکوي.
د ملګروملتو په خبرپاڼه کې ویل شوي چې د حقاني د سفر هدف د عمرې حج ترسره کول دي.
د سلواغې په ۳ مه، حقاني د متحده عربي اماراتو له دولتمشر شیخ محمد په ابوظبۍ کې په خپله ماڼۍ کې وکتل.
سراج الدین حقاني تر دې وړاندې د ۲۰۲۴ په جون میاشت کې هم متحده عربي اماراتو ته تللی و او د دغه هیواد د دولتمشر په شمول یې له بیلابیلو چارواکو سره کتلي و.
تېره میاشت (جنوري) د ملګروملتو امنیت شورا د طالبانو د حکومت د حج او اوقافو وزیر نورمحمد ثاقب ته هم د سعودي عربستان او د ۲۰۲۴ کال د دسمبر په ۲۶مه د طالبانو د بهرنیوچارو وزیر امیرخان متقي ته اجازه ورکړې وه چې متحده عربي اماراتو ته سفر وکړي.
ثاقب او متقي چې د طالبانو د واکمنۍ په لومړۍ دوره کې یوه د قاضي القضات او بل د پوهنې د وزیر په توګه کار کاوه د ۲۰۰۱ کال په جنوري میاشت او سراج الدین حقاني د ۲۰۰۷ کال په جنوري میاشت کې د ملګروملتونو د بندیزونو په لیست کې شامل شول.
سره له دې چې طالبان اوس د افغانستان واکمنان دي خو لا هم د ملګروملتو او د نورو هیوادونو له تورو لیستونو څخه په دې خاطر نه دي ایستل شوي چې دوی د بشري حقونو په ځانګړي ډول د ښځو د حقونو په بې رحمانه سرغړونې تورن دي.
زده کړو او کار ته د نجونو او ښځو د نه پرېښودلو له کبله د طالبانو حکومت د نړۍ هیڅ هیواد په رسمیت نه پېژني او اوس چې د جرمونو له نړیوالې محکمې څخه د طالبانو د مشر د نیونې په اړه د پرېکړې غوښتنه شوې، دا احتمال چې په راتلونکي کې د طالبانو حکومت په رسمیت وپېژندل شي، نور هم کم شوی دی.