تاند(چهارشنبه، د سلواغې/ دلوې ۱۰ مه) د پاکستان د بهرنیو چارو وزارت ویاند شفقت علي خان له امریکايي ځواکونو څخه په افغانستان کې پاته شوې وسلې د پاکستان د امنیت او اتباعو لپاره مستقیم ګواښ وبللې.

د پاکستان د باندنیو چارو وزارت دا خبره وروسته له دې وکړه چې روانه میاشت د امریکا نوي ولسمشر دونالډ ټرمپ تر لوړې یوه ورځ وړاندې وویل چې امریکا به له افغانستانه خپلې وسلې بېرته واخلي.

شفقت علي خان نن (چهارشنبې) وویل چې دا پرمختللي وسلې د پاکستان امنیت او وګړو ته مستقیم ګواښ پېښوي، ځکه چې ترهګرې ډلې، په ځانګړې توګه منع شوی تحریک طالبان پاکستان (TTP)، له دغو وسلو څخه د پاکستان دننه د بریدونو لپاره کار اخلي.

هغه وویل: «په افغانستان کې د پرمختللو وسلو موجودیت د پاکستان او د هغه د وګړو لپاره د ژورې اندېښنې وړ مسئله ده. موږ په وار وار د کابل له ادارې غوښتنه کړې چې ټول لازم تدابیر ونیسي، ترڅو دا وسلې د ناسمو خلکو لاس ته و نه لویږي.»

شفقت علي خان زیاته کړه چې د دې غوښتنې هدف په پاکستان او سیمه کې د سولې ټینګښت دی.

ده وویل، پاکستان دا موضوع بیا بیا له ډیپلوماټیکو لارو مطرح کړې، ټینګار یې کړی چې د سیمې د سولې او ثبات لپاره د افغان چارواکو له‌خوا د سمدستي اقداماتو اړتیا ده، ترڅو دا وسلې ترهګرو ډلو ته و نه رسیږي.

د طالبانو حکومت د وسلو د ورسپارلو په اړه د ټرمپ غوښتنه رد کړه او ویې ویل چې امریکا د پاتې وسلو د بېرته اخیستو پر ځای، باید طالبانو ته نورې پرمختللې وسلې ورکړي، چې دوی د داعش (ISIS-K) پر ضد په جګړه کې لا ځواکمن شي.

پاکستان د نولس سوه اتیایمې او د نولس سوه نوي یمې لسیزې په پای کې له هغه نفوذ څخه په استفادې، چې د افغان مجاهدینو په تنظیمونو کې یې درلود، د شوروي اتحاد له پوځ څخه پاتې وسلې ویجاړې کړې.

په افغانستان کې د امریکايي پوځیانو د حضور په کلونو کې هم پاکستان په ځلونو له امریکايي پوځیانو وغوښتل چې د افغانستان پوځ ته درنې او نورې داسي وسلې ورنه کړي چې دا هیواد یې د بل هیواد پر ضد وکارولی شي.