تاند (پنجشنبه، د سلواعې/ دلوې ۴ مه) د ایران د بهرنیو چارو وزیر عباس عراقچي به ډېر ژر کابل ته سفر وکړي چې د طالبانو له جګپوړو چارواکو سره د دوه اړخیزو موضوعاتو په اړه خبرې وکړي.
د ایران د مهر نیمه دولتي خبري اژانس د راپور له مخې، د دې یو ورځنی سفر، هدف د دواړو هېوادونو ترمنځ پر بېلابېلو علاقې او اندېښنې وړ مسایلو بحث دی.
دا به له کله چې عباس عراقچي د ایران د بهرنیو چارو د وزیر په توګه ټاکل شوی، افغانستان ته د نوموړي لومړنی سفر وي.
په دې سفر کې به له ښاغلي عراقچي سره د بېلابېلو وزارتونو استازي او د اقتصاد او سوداګرۍ یو جګپوړی پلاوی هم ملګری وي.
د مهر اژانس پر اساس، د دواړو ګاونډیو هېوادونو ترمنځ ژورې تاریخي، کلتوري او مذهبي اړیکې د دې اړتیا زیاتوي چې ایران او افغانستان خپلمنځي همکارۍ نوره هم زیاته کړي ترڅو د دواړو ملتونو لوړې ګټې وساتل شي او د ننګونو پر وړاندې مبارزه وشي.
مهر اژانس کابل ته د ښاغلي عراقچي د سفر دقیقه نېټه نه ده ښودلې.