تاند【دوشنبه د سلواغې ـ دلوې لومړۍ】د طالبانو د حکومت صنعت او سوداګرۍ وزیر نورالدین عزیزي د ایران رېل پټلۍ څخه د ګټې اخېستنې له اداري مرستیال مرتضی جعفري سره ترکیې او اروپایي هېوادونو ته د افغانستان سوداګریزو توکو د لېږد په اړه خبرې کړې.
عزیزي له رېللارې د راکړې ورکړې برخه کې د ایران د همکارۍ غوښتنه کړې او د لاښې همغږۍ په موخه یې ایراني پلاوي ته پنځه کسیز ټیم هم ورپېژندلی.
په ورته مهال د ایران رېل پټلۍ څخه د ګټې اخېستنې ادارې مرستیال له خپل لوري د افغانستان سوداګریزو توکو انتقال کې د همکارۍ ډاډ ورکړی دی.
د سرچینې په خبره د افغانستان صادراتي، وارداتي او ټرانزیټي توکي به ټیټه بیه او د امکان تر حده په کمه موده کې لېږدوي.
دغه کتنه داسې مهال شوې، چې تر دې وړاندې ایراني چارواکو ویلي و د ۲۰۲۳ کال په پرتله ۲۰۲۴ کال کې د افغانستان او ایران ترمنځ سوداګري ۸۴ سلنه زیاته شوې.