تاند (یکشنبه، د مرغومي/ جدي ۳۰ مه) د بلوچستان د ازادۍ پوځ (BLA) د سراج جتويي د وژنې او په ایف ډبلیو او باندې د برید مسوولیت په غاړه واخیست.
د بلوچستان د ازادۍ پوځ د ویندوی جنید بلوچ پرون (شنبې) رسنیو ته په استولې خبرپاڼه کې ویلي، «د دوی سرښیندونکو د قابض پاکستاني پوځ او استخباراتي ادارو لهخوا جوړ شوي تش په نوم د مرګ سکواډ مشر، سراج جتوئی، ته د اعدام سزا ورکړه او همدارنګه یې په تربت کې د ایف ډبلیو پر غړیو د موټر بمي چاودنې برید کړی دی.
د بلوچستان د ازادۍ پوځ سرښیندونکو د جنورۍ په ۹مه په ډاډر سیمه کې عملیات ترسره کړل او د پاکستاني پوځ او استخباراتي ادارو لهخوا د مرګ سکواډ پر مرکز یې برید وکړ. په دې عملیاتو کې د مرګ سکواډ مشر، سراج جتوئی، او درې نور کسان نیول شوي دي.