تاند (چهارشنبه، د مرغومي/ جدي ۲۶ مه) د روسیې د بهرنیو چارو وزیر سرګی لاوروف غوښتنه وکړه چې د افغانستان په اړه د چین، پاکستان، روسیې او ایران په څلور اړخیزه ډله کې دې هند هم شامل شي.
نوموړي ټینګار وکړ چې د مسکو، بیجنګ، اسلاماباد او تهران لپاره له هند سره د افغانستان په اړه تعامل سم ګام دی.
لاوروف په خپلو څرګندونو کې د افغانستان په اړه د خبرو اترو لپاره د مسکو، بیجنګ، اسلاماباد او تهران د څلور اړخیزو غونډو پر اهمیت ټینګار وکړ.
د روسیې د بهرنیو چارو وزیر دا هم وویل چې له ترهګرۍ سره مبارزه د پاکستان، افغانستان، هند او د شانګهای د همکارۍ سازمان د نورو غړو هېوادونو همکارۍ ته اړتیا لري.
لاوروف زیاته کړه: ممکن په ۲۰۲۵ کال کې د شانګهای د همکارۍ سازمان د غړو هېوادونو په ګډون یو مرکز جوړ شي چې له نوو ګواښونو، په ځانګړي ډول ترهګرۍ، د نشهيي موادو قاچاق، او منظمو جرمونو سره مبارزه وکړي.
نوموړي همداراز وویل: د شانګهای د همکارۍ سازمان او د مسکو چوکاټ چې افغانستان هم په کې ګډون لري، کولی شي د باور جوړونې او اړیکو د پیاوړتیا لپاره یو فرصت برابر کړي.
روسیې، چین، پاکستان او ایران د افغانستان په اړه د دې کال په تله/ میزان میاشت کې خپله درېیمه غونډه د ملګرو ملتونو د عمومي اسامبلۍ په څنډه کې په نیویارک کې دایره کړه. د دې هېوادونو د بهرنیو چارو وزیرانو په دې ناسته کې د افغانستان د ستونزو د حل په اړه خپل لیدلوري سره پرتله کړل.
د روسیې د بهرنیو چارو وزیر دا څرګندونې یوه اوونۍ وروسته له هغه وکړې چې د هند د بهرنیو چارو مرستیال وزیر، ویکرام میسري، په دوبۍ کې د طالبانو له بهرنیو چارو وزیر امیرخان متقي سره ولیدل.
کچیری پاکستان او چین ته خپګان نه پیدا کیږی