تاند【سه شنبه د مرغومي ـ جدي ۲۵مه】د طالبانو د کار او ټولنیزو چارو وزارت په تېرو درېیو میاشتو کې ۳۳زرو زیات کاري جوازونه وېشلي دي.

د یاد وزارت ویاند وایي، د روان ۱۴۰۳ کال په درېیمه ربعه کې یې ۳۳ زره ۲۰۰ تنو هېوادوالو ته د کار جوازونه ورکړي او له دې لارې یې عواید راټول کړي.

د یاد وزارت د شمېرو له مخې له دې ډلې ۲۱زره ۵۶۷ تنه په دولتي سکټور، ۹۸۰۹ تنه خصوصي سکټور کې په دندو ګمارل شوي دي.

سرچینه زیاتوي، چې دغه راز یې په یاده موده کې ۱۹۲۰ تنو بهرنیو وګړو ته هم د کار جوازونه ورکړي دي.

د طالبانو د حکومت یاده اداره داسې مهال د کاري جوازونو د وېش خبر ورکوي، چې په هېواد کې د طالبانو له حاکمېدو وروسته بې روزګاري اوج ته رسېدلي او بې شمېره ځوانان په ورځني ډول له هېواده په ناقانونه ډول د وتلو هڅه کوي.

د همدې بېوزلۍ له امله تازه یوه کس د ګردو پلور ته ځان چمتو کړی وو، چې سره میاشت یې مخه ونیوله.

د افغاني سرې مياشتې عمومي رييس شهاب‌‌الدين دلاور نن سه شنبه په یوه خبرپانه کې ویلي، چې له ګُرده پلورونکي کس سره یې د ليدنې په مهال پر خوراکي او غير خوراکي توکو سربېره ۲۰ زره افغانۍ نغدي مرسته هم کړې ده.

دا ښایي یواځینی کس نه وي، چې بېوزلۍ د ګُردې پلور ته اړ کړی، سلګونه داسې کورنۍ شته چې د ناچارۍ له امله د بدن د غړو پلور ته اړ شوي دي.